Reviews & Ratings for
Dom zły (2009)

سینەمای پۆڵەندی بە ڕادەیەکی بەرچاو بەرکەوتەی واقیعی سیاسییە. دونیابینی، و نواندنەوەی ڕووداوە ڕاستەقینەکان لە لای سینەما و دەرهێنەرە پۆڵەندییەکان هەستیارە; ئەوان کار دەکەن بۆ پێگەیاندن و گەیاندنی ئەو ناوەڕۆکەی لەسەر بنەمایەکی هونەریی مێژوویی و ئەخلاقیی بونیاد نراوە. حەقیقەتی ئەم هەوڵ و ئاکارانەیش لە هەریەک لە فیلمەکانی (The Pianist) و (Ida) و (Little Rose) و هتد... ڕوونە.

فیلمی (The Dark House) یان (Dom Zly) بە زمانی پۆڵسکی، بینەر ڕووبەڕووی گرفتی جیاواز دەخاتەوە، لەوانە: مەسەلەی ئەخلاق، سیفاتی میلیشیا بیورەکراتییەکان و سیاسەتمەدارەکان، هەژموونی دەسەڵات و فیکری سۆڤیەتی، کوشتن و هۆمۆساید، بێتاوانی، سێکس، بەکارهێنانی مێینە، هێزی پارە و سەرمایەداریی، جەنگی سارد وەک ئامڕێزێکی کاریگەری پڕوپاگەندە لەسەر ناوچە داگیرکراوەکان، کۆڵۆنیاڵیزم و دەرهاویشتەکانی، ئەم گرفتانە و زۆری دیکە ڕووبەڕووی بینەر دەبنەوە.

فیلمەکە بێئەندازە سەرسوڕهێنەرە و خاوەن تێکنیکێکی تا ڕادەیەک باڵایە، خاوەن ژینگەیەکی ڕیاڵیستییە و بە بینینی بینەر هەست دەکات کە لەسەر ڕێبازی دۆکیۆدراما بەرهەمهاتووە. ناوەڕۆک و پڵۆت دەکرا توندتر دابڕێژرێنەوە، بەڵام توانیویانە خزمەت بە بابەت و باسی سەرەکی بکەن. فیلمێکی توند و بەهێز، پڕ لە دیمەنی خوێناوی و دەستدرێژی و بەکارهێنانی ماددە. هەموو ئەمانە بە شێوەی کۆمیدیای ڕەش خۆیان دەنوێنن.

لە داهاتوودا، وتارم لەسەری دەبێت.